| amal | التاريخ: السبت, 2013-03-23, 4:07 PM | رسالة # 1 |
|
عضو بلاتيني
مجموعة: المدراء
رسائل: 560
| بالخطوات حمام مغربي لجسمك ووجهك
نفسك إن بشرتك تكون ناعمة ونضرة , فنانيس سليم خبيرة التجميل ولفات الطرح تقدم لك هذه الماسكات لتحصلي على نفس النتيجة التي تحققها هذه المراكز بس في البيت.
أولا: حمام البخار لبشرة الوجه :
حمام البخار من الحمامات المعروفة جداً لبشرة الوجه، لأنه بينشط الدورة الدموية في البشرة، وبيفتّح المسام لتتخلصي من الإفرازات الدهنية والرءوس السوداء اللي ممكن إنها تكون موجودة على وجهك..
وكل اللي هتحتاجي له:
1- شيح "من عند العطار".
2- مياه.
3- فوطة كبيرة.
الخطوات:
1- سيبي الشيح يغلي في حلة متوسطة الحجم.
2- بعد ما تتأكدي إن المياه وصلت لمرحلة الغليان حطي الفوطة على رأسك وافرديها كويس وشيلي "الحَلّة" من على النار وقربي وجهك من "الحلة" علشان وجهك يلاقي البخار اللي طالع من "الحلة".
3- سيبي البخار يتسرب لبشرتك لمدة 10 دقائق، ولو حسيتِ إن بشرتك تعبت من البخار ممكن إنك تريحي شوية وبعد كده ترجعي تاني تكملي.
4- بعد مرور الـ10 دقائق إمسحي بشرتك بإسفنجة ناعمة مبلولة بميّه ساقعة.
ثانيا: حمام الثلج لبشرة الوجه
لو كنتِ بتعاني من وجود سواد جامد جدا في المنطقة اللي تحت العين يبقى عليكِ وعلى حمام التلج، وعلى فكرة حمام التلج منعش جداً للبشرة.
كل اللي هتعمليه:
قطعة تلج متوسطة الحجم.
الطريقة:
إمسكي قطعة الثلج ومرريها على وجهك في حركات دائرية سريعة، طبعاً في البداية هتحسي إنك مش قادرة تستحمليها لكن بعد كده هتلاقي نفسك مستمتعة جداً إستمري لغاية ما الثلجة تدوب وأول ما تخلصي هتلاقي وشك بقى لونه وردي وهتحسي إنه منتعش جداً..
أما بالنسبة للحمام المغربي للجسم :
المفروض تعمليه قبل فرحك بيوم على الأقل حمام المغربي طبعا فوايدة كثيرة لأنه بيزيل الخلايا الميتة من الجسم وبيفتح مسام البشرة ليخلصها من الحبوب والدهون بس أهم حاجة خلي بالك منها هي إنك قبل الحمام تشربي كمية كبيرة من السوائل ؛ وده لأن الجسم بيفقد سوائل كتيرة؛ بسبب البخار والحرارة العالية وبكده ممكن تصابي بالهبوط.
وكل اللي هتحتاجي إليه:
1- ماء ساخن جداً.
2- ليفة مغربي خشنة "هتلاقيها في الصيدليات الكبيرة".
3- صابونة مغربي "هتلاقيها في الصيدليات الكبيرة".
الطريقة:
1-إقفلي أي منفذ للهواء في الحمام "الشباك والباب".
2- جيبي طبق وإمليه مياه سخنة جداً وحطي فيه اللوفة المغربي.
3- إفتحي المياه السخنة في البانيو على الآخر لغاية ما يبقى فيه بخار جامد في الحمام، وبعدين سدي البانيو وإملي نصه من المياه السخنة.
4- إقعدي في البانيو لمدة نص ساعة علشان جسمك يتعرض لأكبر قدر من البخار.
5- هاتي الصابون المغربي وإبدئي في فركه بالراحة على جسمك، وده علشان بشرتك ما يحصلش لها إلتهاب
6- سيبي الصابون على جسمك لمدة 10 دقائق.
7-إشطفي جسمك بالمياه السخنة وبعدين حطي كمية ثانية من الصابون بنفس الطريقة السابقة وسيبيه برضه لمدة 10 دقائق.
8- ممكن تستفيدي بالفترة دي في تنظيف الكعبين بالحجر الخاص بالقدمين "هتلاقيه عند العطار".
9- بعد مرور 10 دقائق إشطفي جسمك من الصابون بالمياه السخنة.
10- امسكي الليفة المغربي وابدئي في دعك جسمك ماعدا منطقة الوجه بشكل دائري، أثناء دعك جسمك هتلاقي إن الخلايا الميتة في الجسم بتتشال وبتقع على الأرض بمنتهى السهولة.
11- اشطفي جسمك كويس بالمياه السخنة، واوعي تسمعي كلام أي حد يقول لك إنك تستخدمي عطور أو أي مستحضرات تجميل أو كريمات في الحمام المغربي؛ لأن كل الحاجات دي فيها مواد كيميائية ممكن إنها تضر بشرتك.
ملحوظة: ممكن تجيبي كمان الدلكة السوداني "موجودة عند العطار" وابدئي في فرك جسمك كله بيها، فهى عبارة عن عجينة من مكونات عطرية وأعشاب وأخشاب ثمينة غطى بها كل الجسم، وعلى فكرة الدلكة دي مهمة جداً لأنها بتكسب الجسم لمعان ولون وردي..
سيبي الدلكة على جسمك لمدة ربع ساعة وبعد كده اشطفي جسمك بالماء الفاتر المضاف إليه ماء الورد.
امل الخولى
|
| |
| |
